საქართველოს დამოუკიდებლობის დღისადმი მიძღვნილი ღონისძიებების ფარგლებში რუსთაველის გამზირზე სოფლის მეურნეობის სამინისტროს მიერ წარმოდგენილი სტენდი, სოფლის მეურნეობის მინისტრმა, ოთარ დანელიამ დაათვალიერა.
როგორც მინისტრმა განაცხადა, სახელმწიფოებრივი დამოუკიდებლობის აღდგენა ერის უდიდესი მონაპოვარია.
"ეს ჩვენი დღეა, თქვენი დღეა, ეს არის ყველა ქართველის დღე. ჩვენ ტრადიციულად წარმოდგენილი ვართ სოფლის მეურნეობის კუთხით, ვცდილობთ, ყოველ წელს ვიყოთ ორიგინალურები, განსხვავებულები და მე მგონი, ეს წელსაც გამოგვივიდა,"_განაცხადა დანელიამ.
მინისტრმა ასევე დიდი იმედი გამოთქვა, რომ კონკრეტული ნაბიჯები გადაიდგმება იმ უსამართლობის აღმოსაფხვრელად, რომელსაც გიგა ოთხოზორია შეეწირა.
"მიუხედავად იმისა, რომ დღევანდელი დღე არის ძალიან მნიშვნელოვანი და სიმბოლური, ეს არის საქართველოს ძლიერებისა და დამოუკიდებლობის დღე, დღეს ასევე კრძალავენ გიგა ოთხოზორიას, რომელიც იმ უსამართლობას შეეწირა, რომელიც წლების განმავლობაში დამკვიდრდა. მე დიდი იმედი მაქვს, კონკრეტული ნაბიჯები გადაიდგმება, რომ ეს პრობლემები სამუდამოდ მოგვარდეს,"_ განაცხადა მინისტრმა.
წყარო:
gurianews.com
gurianews.com
26.05.2016